dil mein ab taqat kahan KHunaba-afshani kare

dil meñ ab tāqat kahāñ ḳhūnāba-afshānī kare

varna ġham vo zahr hai patthar ko bhī paanī kare

'aql vo nāseh ki har dam laġhzish-e-pā kā ḳhayāl

dil vo dīvāna yahī chāhe ki nādānī kare

haañ mujhe bhī ho gila be-mehrī-e-hālāt kā

tujh ko āzurda agar merī pareshānī kare

ye to ik shahr-e-junūñ hai chāk-dāmāno yahāñ

sab ke sab vahshī haiñ kis ko kaun zindānī kare

mausam-e-gul hai magar be-rang hai shāḳh-e-mizha

kitnā sharminda hameñ āñkhoñ kī vīrānī kare

hañste chehroñ se diloñ ke zaḳhm pahchānegā kaun

tujh se baḌh kar zulm apnī ḳhanda-peshānī kare

nāsehoñ ko kaun samjhā.e na samjhegā 'farāz'

vo to sab kī baat sun le aur man-mānī kare

dil mein ab taqat kahan KHunaba-afshani kare

warna gham wo zahr hai patthar ko bhi pani kare

'aql wo naseh ki har dam laghzish-e-pa ka KHayal

dil wo diwana yahi chahe ki nadani kare

han mujhe bhi ho gila be-mehri-e-haalat ka

tujh ko aazurda agar meri pareshani kare

ye to ek shahr-e-junun hai chaak-damano yahan

sab ke sab wahshi hain kis ko kaun zindani kare

mausam-e-gul hai magar be-rang hai shaKH-e-mizha

kitna sharminda hamein aankhon ki virani kare

hanste chehron se dilon ke zaKHm pahchanega kaun

tujh se baDh kar zulm apni KHanda-peshani kare

nasehon ko kaun samjhae na samjhega 'faraaz'

wo to sab ki baat sun le aur man-mani kare