dil mein aur kuchh lab par baat dilrubai ki

dil meñ aur kuchh lab par baat dilrubā.ī kī

tum ne kis salīqe se mujh se bevafā.ī kī

fāsle mohabbat meñ jitne kam hue un se

us qadar qarīb aa.iiñ sā.ateñ judā.ī kī

haal bhī mirā koī phir na pūchhne aaya

kuchh dinoñ to yāroñ ne merī ham-navā.ī kī

yuuñ to rahnumā mujh ko saiñkaḌoñ mile lekin

merī to faqat mere dil ne rahnumā.ī kī

be-chale kisī ko bhī manzileñ nahīñ miltīñ

phir hai ye shikāyat kyoñ apnī nā-rasā.ī kī

qaid qatl ranj-o-ġham saḳhtiyāñ dil-āzārī

saiñkaḌoñ sazā.eñ haiñ ek haq-navā.ī kī

ab paḌā hai miTTī meñ shāḳh se judā ho kar

barg ne havā se kyoñ zor-āzmā.ī kī

kis liye kuñ.eñ meñ tum us ko pheñk aa.e ho

bhā.iyoñ se pūchho to kyā ḳhatā thī bhaa.ī kī

ġhair hoñ ki apne hoñ sab se jhuk ke miltā huuñ

ai 'hunar' nahīñ aadat mujh ko ḳhud-satā.ī kī

dil mein aur kuchh lab par baat dilrubai ki

tum ne kis saliqe se mujh se bewafai ki

fasle mohabbat mein jitne kam hue un se

us qadar qarib aain saaten judai ki

haal bhi mera koi phir na puchhne aaya

kuchh dinon to yaron ne meri ham-nawai ki

yun to rahnuma mujh ko sainkaDon mile lekin

meri to faqat mere dil ne rahnumai ki

be-chale kisi ko bhi manzilen nahin miltin

phir hai ye shikayat kyon apni na-rasai ki

qaid qatl ranj-o-gham saKHtiyan dil-azari

sainkaDon sazaen hain ek haq-nawai ki

ab paDa hai miTTi mein shaKH se juda ho kar

barg ne hawa se kyon zor-azmai ki

kis liye kunen mein tum us ko phenk aae ho

bhaiyon se puchho to kya KHata thi bhai ki

ghair hon ki apne hon sab se jhuk ke milta hun

ai 'hunar' nahin aadat mujh ko KHud-satai ki