dil mein baiTha tha ek Dar shayad

dil meñ baiThā thā ek Dar shāyad

aaj bhī hai vo ham-safar shāyad

haath patthar se ho ga.e ḳhālī

peḌ par hai nahīñ samar shāyad

DhūñDhtā thā vajūd apnā vo

thā idhar ab gayā udhar shāyad

surḳhiyāñ ug rahī haiñ dāman par

ho gayā haath ḳhuuñ se tar shāyad

phuul ulfat ke khil rahe hoñ jahāñ

hogā aisā bhī ik nagar shāyad

bekalī baḌh ga.ī hai dariyā kī

kah gayā jhuk ke kuchh shajar shāyad

dard kā ho gayā hai maskan vo

log kahte haiñ jis ko ghar shāyad

mil ke un se ḳhushī huī mujh ko

vo bhī hoñge to ḳhush magar shāyad

rote rote hañsī mirī ḳhvāhish

mil ga.ī ik na.ī ḳhabar shāyad

din kā kaTnā muhāl hai to sahī

raat ho jā.egī basar shāyad

aag paanī meñ jo lagātā hai

vo bhī hogā koī bashar shāyad

sehn-e-dil se ḳhushī nahīñ guzrī

rāsta thā vo pur-ḳhatar shāyad

dhuup ke ghar ghaTā ga.ī 'ja.afar'

ḳhushk karne ko bāl-o-par shāyad

dil mein baiTha tha ek Dar shayad

aaj bhi hai wo ham-safar shayad

hath patthar se ho gae KHali

peD par hai nahin samar shayad

DhunDhta tha wajud apna wo

tha idhar ab gaya udhar shayad

surKHiyan ug rahi hain daman par

ho gaya hath KHun se tar shayad

phul ulfat ke khil rahe hon jahan

hoga aisa bhi ek nagar shayad

bekali baDh gai hai dariya ki

kah gaya jhuk ke kuchh shajar shayad

dard ka ho gaya hai maskan wo

log kahte hain jis ko ghar shayad

mil ke un se KHushi hui mujh ko

wo bhi honge to KHush magar shayad

rote rote hansi meri KHwahish

mil gai ek nai KHabar shayad

din ka kaTna muhaal hai to sahi

raat ho jaegi basar shayad

aag pani mein jo lagata hai

wo bhi hoga koi bashar shayad

sehn-e-dil se KHushi nahin guzri

rasta tha wo pur-KHatar shayad

dhup ke ghar ghaTa gai 'jafar'

KHushk karne ko baal-o-par shayad