dil mein charagh-e-ishq na jo zau-fishan rahe

dil meñ charāġh-e-ishq na jo zau-fishāñ rahe

rānā.ī-e-ḳhayāl na husn-e-bayāñ rahe

shāmil hai us meñ merī tamannā kā ḳhuun bhī

rangīñ tirī adā kī na kyoñ dāstāñ rahe

dil miT gayā kashākash-e-ummīd-o-bīm meñ

ab mehrbāñ ho koī ki nā-mehrbāñ rahe

us rashk kā burā ho jo dekhā unheñ kabhī

pahroñ ham apne aap se bhī bad-gumāñ rahe

mahrūmī-e-davām ne baḳhshā hameñ sukūñ

kunj-e-qafas meñ pahuñche to ham shādmāñ rahe

pūchho ye apne jalva-e-mahjūb se zarā

ham kyoñ fareb-ḳhurda-e-vahm-o-gumāñ rahe

bazm-e-mushā.era meñ sunā.eñ kise ġhazal

ab qadr-dāñ zamāne meñ 'sā.ib' kahāñ rahe

dil mein charagh-e-ishq na jo zau-fishan rahe

ranai-e-KHayal na husn-e-bayan rahe

shamil hai us mein meri tamanna ka KHun bhi

rangin teri ada ki na kyon dastan rahe

dil miT gaya kashakash-e-ummid-o-bim mein

ab mehrban ho koi ki na-mehrban rahe

us rashk ka bura ho jo dekha unhen kabhi

pahron hum apne aap se bhi bad-guman rahe

mahrumi-e-dawam ne baKHsha hamein sukun

kunj-e-qafas mein pahunche to hum shadman rahe

puchho ye apne jalwa-e-mahjub se zara

hum kyon fareb-KHurda-e-wahm-o-guman rahe

bazm-e-mushaera mein sunaen kise ghazal

ab qadr-dan zamane mein 'saib' kahan rahe