دل میں چراغ شوق جلانے سے فائدہ

دل میں چراغ شوق جلانے سے فائدہ

دامن میں اپنے آگ لگانے سے فائدہ

فکر معاش سے ہی نکلنا ہو جب محال

دل میں کسی کی یاد بسانے سے فائدہ

جو چشم نم تھے ان کو ہنساتے تو بات تھی

روتے ہوئے کو اور رلانے سے فائدہ

جب حال دل کے واسطے ناسور بن چکا

ماضی کی یاد دل میں جگانے سے فائدہ

فصل خزاں میں عہد بہاراں کا جشن خوب

ویران بام و در کو سجانے سے فائدہ

دل میں تمہاری یاد ہی جب پھول بن گئی

غنچے نئے کچھ اور کھلانے سے فائدہ

دیکھا جو داغ چاند میں آیا یہی خیال

اس طرح دل کے داغ دکھانے سے فائدہ

مانا تصورات میں آئے ہوئے تو ہو

دل کو مگر یہ خواب دکھانے سے فائدہ

دامن میں اپنے خار ہیں مانا ضیاؔ مگر

ہر وقت ان کا سوگ منانے سے فائدہ