dil mein charagh-e-shauq jalane se faeda

dil meñ charāġh-e-shauq jalāne se fā.eda

dāman meñ apne aag lagāne se fā.eda

fikr-e-ma.āsh se hī nikalnā ho jab muhāl

dil meñ kisī kī yaad basāne se fā.eda

jo chashm-e-nam the un ko hañsāte to baat thī

rote hue ko aur rulāne se fā.eda

jab haal dil ke vāste nāsūr ban chukā

maazī kī yaad dil meñ jagāne se fā.eda

fasl-e-ḳhizāñ meñ ahd-e-bahārāñ kā jashn ḳhuub

vīrān bām-o-dar ko sajāne se fā.eda

dil meñ tumhārī yaad hī jab phuul ban ga.ī

ġhunche na.e kuchh aur khilāne se fā.eda

dekhā jo daaġh chāñd meñ aaya yahī ḳhayāl

is tarah dil ke daaġh dikhāne se fā.eda

maanā tasavvurāt meñ aa.e hue to ho

dil ko magar ye ḳhvāb dikhāne se fā.eda

dāman meñ apne ḳhaar haiñ maanā 'ziyā' magar

har-vaqt un kā sog manāne se fā.eda

dil mein charagh-e-shauq jalane se faeda

daman mein apne aag lagane se faeda

fikr-e-maash se hi nikalna ho jab muhaal

dil mein kisi ki yaad basane se faeda

jo chashm-e-nam the un ko hansate to baat thi

rote hue ko aur rulane se faeda

jab haal dil ke waste nasur ban chuka

mazi ki yaad dil mein jagane se faeda

fasl-e-KHizan mein ahd-e-bahaaran ka jashn KHub

viran baam-o-dar ko sajaane se faeda

dil mein tumhaari yaad hi jab phul ban gai

ghunche nae kuchh aur khilane se faeda

dekha jo dagh chand mein aaya yahi KHayal

is tarah dil ke dagh dikhane se faeda

mana tasawwuraat mein aae hue to ho

dil ko magar ye KHwab dikhane se faeda

daman mein apne KHar hain mana 'ziya' magar

har-waqt un ka sog manane se faeda