dil mein chubhte tere paikan nazar aate hain

dil meñ chubhte tire paikān nazar aate haiñ

kyā nokīle mire mehmān nazar aate haiñ

maiñ kahāñ aur kahāñ husn-e-dil-afroz un kā

mire ghar meñ vo tirī shaan nazar aate haiñ

nazar aatī hai har ā.īne meñ sūrat un kī

yahī baa.is hai jo hairān nazar aate haiñ

ḳhalvat-e-qabr meñ so so rahe jā kar ahbāb

ghar jo ābād the vīrān nazar aate haiñ

arsa-e-hashr hai yā kūcha-e-qātil yā-rab

saikḌoñ chāk-garebān nazar aate haiñ

sog kis kā hai batā dījiye ġham kis kā hai

aap kuchh aaj pareshān nazar aate haiñ

dil meñ aate hī samā.e haiñ vo āñkhoñ meñ mirī

itne nāzuk kahīñ insān nazar aate haiñ

sach hai hotī hai burī chiiz musībat 'safdar'

jāne-būjhe mire anjān nazar aate haiñ

dil mein chubhte tere paikan nazar aate hain

kya nokile mere mehman nazar aate hain

main kahan aur kahan husn-e-dil-afroz un ka

mere ghar mein wo teri shan nazar aate hain

nazar aati hai har aaine mein surat un ki

yahi bais hai jo hairan nazar aate hain

KHalwat-e-qabr mein so so rahe ja kar ahbab

ghar jo aabaad the viran nazar aate hain

arsa-e-hashr hai ya kucha-e-qatil ya-rab

saikDon chaak-gareban nazar aate hain

sog kis ka hai bata dijiye gham kis ka hai

aap kuchh aaj pareshan nazar aate hain

dil mein aate hi samae hain wo aankhon mein meri

itne nazuk kahin insan nazar aate hain

sach hai hoti hai buri chiz musibat 'safdar'

jaane-bujhe mere anjaan nazar aate hain