دل میں چبھتے ترے پیکان نظر آتے ہیں

دل میں چبھتے ترے پیکان نظر آتے ہیں

کیا نوکیلے مرے مہمان نظر آتے ہیں

میں کہاں اور کہاں حسن دل افروز ان کا

مرے گھر میں وہ تری شان نظر آتے ہیں

نظر آتی ہے ہر آئینے میں صورت ان کی

یہی باعث ہے جو حیران نظر آتے ہیں

خلوت قبر میں سو سو رہے جا کر احباب

گھر جو آباد تھے ویران نظر آتے ہیں

عرصۂ حشر ہے یا کوچۂ قاتل یا رب

سیکڑوں چاک گریبان نظر آتے ہیں

سوگ کس کا ہے بتا دیجئے غم کس کا ہے

آپ کچھ آج پریشان نظر آتے ہیں

دل میں آتے ہی سمائے ہیں وہ آنکھوں میں مری

اتنے نازک کہیں انسان نظر آتے ہیں

سچ ہے ہوتی ہے بری چیز مصیبت صفدرؔ

جانے بوجھے مرے انجان نظر آتے ہیں