dil mein ghar banane mein der kitni lagti hai

dil meñ ghar banāne meñ der kitnī lagtī hai

ranjisheñ miTāne meñ der kitnī lagtī hai

ek 'umr lagtī hai izzateñ kamāne meñ

izzateñ gañvāne meñ der kitnī lagtī hai

tīrgī ke mausam meñ raushnī to kar dete

ik diyā jalāne meñ der kitnī lagtī hai

saañs kā bharosa kyā Dor hai nafas kī bas

Dor TuuT jaane meñ der kitnī lagtī hai

e'tibār uThne se dil meñ chhed bante haiñ

kashtī Duub jaane meñ der kitnī lagtī hai

ranjishoñ kī girheñ jab do diloñ meñ paḌtī haiñ

rabt TuuT jaane meñ der kitnī lagtī hai

ham bhī ḳhud ko badleñ aur tum bhī apnī zid chhoḌo

fāsle miTāne meñ der kitnī lagtī hai

lamha bhar ko ruk jaao ik zarā Thahar jaao

hāl-e-dil sunāne meñ der kitnī lagtī hai

ġham ġhazal meñ bhar denā dard nazm kar denā

'shamsa' ġham chhupāne meñ der kitnī lagtī hai

dil mein ghar banane mein der kitni lagti hai

ranjishen miTane mein der kitni lagti hai

ek 'umr lagti hai izzaten kamane mein

izzaten ganwane mein der kitni lagti hai

tirgi ke mausam mein raushni to kar dete

ek diya jalane mein der kitni lagti hai

sans ka bharosa kya Dor hai nafas ki bas

Dor TuT jaane mein der kitni lagti hai

e'tibar uThne se dil mein chhed bante hain

kashti Dub jaane mein der kitni lagti hai

ranjishon ki girhen jab do dilon mein paDti hain

rabt TuT jaane mein der kitni lagti hai

hum bhi KHud ko badlen aur tum bhi apni zid chhoDo

fasle miTane mein der kitni lagti hai

lamha bhar ko ruk jao ek zara Thahar jao

haal-e-dil sunane mein der kitni lagti hai

gham ghazal mein bhar dena dard nazm kar dena

'shamsa' gham chhupane mein der kitni lagti hai