dil mein hai gham-o-ranj-o-alam hirs-o-hawa band

dil meñ hai ġham-o-ranj-o-alam hirs-o-havā band

duniyā meñ muḳhammas kā hamāre na khulā band

ham daam meñ phañste hī hue āshiq-e-sayyād

ye aur bhī ik band pe mazbūt lagā band

ai hazrat-e-dil jā.iye merā bhī ḳhudā hai

be aap ke rahne kā nahīñ kaam mirā band

ai mohtasib ik dam se tirī kitnī jafā.eñ

shīshe kā hai dam band surāhī kā galā band

dam rukte hī siine se nikal paḌte haiñ aañsū

bārish kī alāmat hai jo hotī hai havā band

kahte the ham ai 'dāġh' vo kūcha hai ḳhatarnāk

chhup chhup ke magar aap kā jaanā na huā band

dil mein hai gham-o-ranj-o-alam hirs-o-hawa band

duniya mein muKHammas ka hamare na khula band

hum dam mein phanste hi hue aashiq-e-sayyaad

ye aur bhi ek band pe mazbut laga band

ai hazrat-e-dil jaiye mera bhi KHuda hai

be aap ke rahne ka nahin kaam mera band

ai mohtasib ek dam se teri kitni jafaen

shishe ka hai dam band surahi ka gala band

dam rukte hi sine se nikal paDte hain aansu

barish ki alamat hai jo hoti hai hawa band

kahte the hum ai 'dagh' wo kucha hai KHatarnak

chhup chhup ke magar aap ka jaana na hua band