dil mein hai ek raaz jo honTon tak aa sakta nahin

dil meñ hai ik raaz jo hoñToñ tak aa saktā nahīñ

ya.anī maiñ jis haal meñ bhī huuñ batā saktā nahīñ

be-ḳhudī-e-zauq-e-sajda ne ye aalam kar diyā

sar to sar ab to nigāheñ bhī uThā saktā nahīñ

hai razā-e-dost meñ shāmil junūn-e-ishq bhī

chāhe kuchh kiije mujhe to hosh aa saktā nahīñ

un ke ik jalve meñ hai mahdūd un ke sāmne

merā jo aalam do-ālam meñ samā saktā nahīñ

zāhir-o-bātin kī har tafrīq hī jaatī rahī

ab maiñ chāhūñ bhī to hāl-e-dil chhupā saktā nahīñ

un kī muḳhtārī bhī ik shān-e-karam hai aur kyā

jo kisī saa.il se dāman tak chhuḌā saktā nahīñ

'kaif' ik ḳhvāb-e-pareshāñ hai kisī mahbūb kā

lekin aisā jis ko vo ḳhud bhī bhulā saktā nahīñ

dil mein hai ek raaz jo honTon tak aa sakta nahin

yani main jis haal mein bhi hun bata sakta nahin

be-KHudi-e-zauq-e-sajda ne ye aalam kar diya

sar to sar ab to nigahen bhi uTha sakta nahin

hai raza-e-dost mein shamil junun-e-ishq bhi

chahe kuchh kije mujhe to hosh aa sakta nahin

un ke ek jalwe mein hai mahdud un ke samne

mera jo aalam do-alam mein sama sakta nahin

zahir-o-baatin ki har tafriq hi jati rahi

ab main chahun bhi to haal-e-dil chhupa sakta nahin

un ki muKHtari bhi ek shan-e-karam hai aur kya

jo kisi sail se daman tak chhuDa sakta nahin

'kaif' ek KHwab-e-pareshan hai kisi mahbub ka

lekin aisa jis ko wo KHud bhi bhula sakta nahin