dil mein hamare ab koi arman nahin raha

dil meñ hamāre ab koī armāñ nahīñ rahā

vo ehtimām-e-gardish-e-daurāñ nahīñ rahā

pesh-e-nazar vo ḳhusrav-e-ḳhūbāñ nahīñ rahā

merī hayāt-e-shauq kā sāmāñ nahīñ rahā

samjhā rahā huuñ yuuñ dil-e-muztar ko hijr meñ

vo kaun hai jo ġham se pareshāñ nahīñ rahā

dekhā hai maiñ ne gesū-e-kāfir kā mojaza

tār-e-nafas bhī merā musalmāñ nahīñ rahā

ashkoñ ke saath saath kuchh armāñ nikal ga.e

bechainiyoñ kā dil meñ vo tūfāñ nahīñ rahā

ai chārasāz sa.i-e-musalsal fuzūl hai

terā marīz qābil-e-darmāñ nahīñ rahā

us kī hayāt us ke liye maut ai 'azīz'

jis par ki us nigāh kā ehsāñ nahīñ rahā

dil mein hamare ab koi arman nahin raha

wo ehtimam-e-gardish-e-dauran nahin raha

pesh-e-nazar wo KHusraw-e-KHuban nahin raha

meri hayat-e-shauq ka saman nahin raha

samjha raha hun yun dil-e-muztar ko hijr mein

wo kaun hai jo gham se pareshan nahin raha

dekha hai main ne gesu-e-kafir ka mojaza

tar-e-nafas bhi mera musalman nahin raha

ashkon ke sath sath kuchh arman nikal gae

bechainiyon ka dil mein wo tufan nahin raha

ai chaarasaz sai-e-musalsal fuzul hai

tera mariz qabil-e-darman nahin raha

us ki hayat us ke liye maut ai 'aziz'

jis par ki us nigah ka ehsan nahin raha