dil mein hazar hasraten pinhan kiye hue

dil meñ hazār hasrateñ pinhāñ kiye hue

jiite haiñ taar taar garebāñ kiye hue

ai rif.at-e-hayāt tirī justujū meñ ham

phirte haiñ zaḳhm zaḳhm charāġhāñ kiye hue

ai dost ham ne dard kī rāteñ guzār diiñ

palkoñ pe āñsuoñ kā charāġhāñ kiye hue

ham vo haiñ rif'atoñ kī tamannā meñ 'umr bhar

rahte haiñ hādsāt ko mehmāñ kiye hue

kah do kalī kalī se khile ab chaman chaman

ham aa ga.e haiñ azm-e-bahārāñ kiye hue

dil mein hazar hasraten pinhan kiye hue

jite hain tar tar gareban kiye hue

ai rifat-e-hayat teri justuju mein hum

phirte hain zaKHm zaKHm charaghan kiye hue

ai dost hum ne dard ki raaten guzar din

palkon pe aansuon ka charaghan kiye hue

hum wo hain rif'aton ki tamanna mein 'umr bhar

rahte hain hadsat ko mehman kiye hue

kah do kali kali se khile ab chaman chaman

hum aa gae hain azm-e-bahaaran kiye hue