dil mein ho jo bhi bahr-e-KHuda kah liya karo

dil meñ ho jo bhī bahr-e-ḳhudā kah liyā karo

achchhā nahīñ kaho to burā kah liyā karo

ḳhūn-e-jigar ko rang-e-hinā kah liyā karo

un ke sitam ko un kī adā kah liyā karo

tahzīb-e-ġham ye kahtī hai ḳhāmosh lab raheñ

āñkhoñ se apnī shikva gila kah liyā karo

mumkin nahīñ hai dost ġham-e-ishq se najāt

ab dard ko hī dil kī davā kah liyā karo

ye bhī atā hai us kī jise vo navāz de

ġhazloñ meñ tum bhī hamd-o-sanā kah liyā karo

zulmat-kade meñ karte ho kyoñ raushnī talāsh

tārīkiyoñ ko hañs ke ziyā kah liyā karo

ahbāb de rahe haiñ taqīyye kā mashvara

rahzan ko tum bhī rāh-numā kah liyā karo

rasman duā ko haath uThāne se fā.eda

kuchh to duā meñ harf-e-duā kah liyā karo

lab kholne kī tum ko ijāzat nahīñ 'suhaib'

ḳhāmoshiyoñ ko dil kī sadā kah liyā karo

dil mein ho jo bhi bahr-e-KHuda kah liya karo

achchha nahin kaho to bura kah liya karo

KHun-e-jigar ko rang-e-hina kah liya karo

un ke sitam ko un ki ada kah liya karo

tahzib-e-gham ye kahti hai KHamosh lab rahen

aankhon se apni shikwa gila kah liya karo

mumkin nahin hai dost gham-e-ishq se najat

ab dard ko hi dil ki dawa kah liya karo

ye bhi ata hai us ki jise wo nawaz de

ghazlon mein tum bhi hamd-o-sana kah liya karo

zulmat-kade mein karte ho kyon raushni talash

tarikiyon ko hans ke ziya kah liya karo

ahbab de rahe hain taqiyye ka mashwara

rahzan ko tum bhi rah-numa kah liya karo

rasman dua ko hath uThane se faeda

kuchh to dua mein harf-e-dua kah liya karo

lab kholne ki tum ko ijazat nahin 'suhaib'

KHamoshiyon ko dil ki sada kah liya karo