دل میں ہجوم شوق و تمنا لیے ہوئے

دل میں ہجوم شوق و تمنا لیے ہوئے

جاتا ہوں تیری بزم سے کیا کیا لیے ہوئے

نیرنگیٔ جمال ہے جلوہ گہہ خیال

اس دل میں ہوں میں حسن کی دنیا لیے ہوئے

امید زیست اس کو ہو کیا جس کے واسطے

آئے پیام موت مسیحا لیے ہوئے

وہ جلوہ گاہ ناز ہو اور چشم شوق میں

ہوں کس قدر میں دل میں تمنا لیے ہوئے

یہ مسکرا کے کس نے نظر دل پہ ڈال دی

ہر ہر تڑپ ہے شان تمنا لیے ہوئے

ارماں کی فکر کس کو تمنا کا ذکر کیا

دل خود ہے اک نظر کا سہارا لیے ہوئے

ڈرنے لگے ہیں اب وہ نظر سے مری منیرؔ

گویا سکوت بھی ہے تقاضا لیے ہوئے