dil mein hujum-e-shauq-o-tamanna liye hue

dil meñ hujūm-e-shauq-o-tamannā liye hue

jaatā huuñ terī bazm se kyā kyā liye hue

nairañgī-e-jamāl hai jalva-gah-e-ḳhayāl

us dil meñ huuñ maiñ husn kī duniyā liye hue

ummīd-e-zīst us ko ho kyā jis ke vāste

aa.e payām-e-maut masīhā liye hue

vo jalva-gāh-e-nāz ho aur chashm-e-shauq maiñ

huuñ kis qadar maiñ dil meñ tamannā liye hue

ye muskurā ke kis ne nazar dil pe Daal dī

har har taḌap hai shān-e-tamannā liye hue

armāñ kī fikr kis ko tamannā kā zikr kyā

dil ḳhud hai ik nazar kā sahārā liye hue

Darne lage haiñ ab vo nazar se mirī 'munīr'

goyā sukūt bhī hai taqāzā liye hue

dil mein hujum-e-shauq-o-tamanna liye hue

jata hun teri bazm se kya kya liye hue

nairangi-e-jamal hai jalwa-gah-e-KHayal

us dil mein hun main husn ki duniya liye hue

ummid-e-zist us ko ho kya jis ke waste

aae payam-e-maut masiha liye hue

wo jalwa-gah-e-naz ho aur chashm-e-shauq main

hun kis qadar main dil mein tamanna liye hue

ye muskura ke kis ne nazar dil pe Dal di

har har taDap hai shan-e-tamanna liye hue

arman ki fikr kis ko tamanna ka zikr kya

dil KHud hai ek nazar ka sahaara liye hue

Darne lage hain ab wo nazar se meri 'munir'

goya sukut bhi hai taqaza liye hue