dil mein ek aatish-e-benam-o-nishan hai jaise

dil meñ ik ātish-e-benām-o-nishāñ hai jaise

koī sho.ala sā rag-o-pai meñ ravāñ hai jaise

allah allāh re taqdīs-e-mohabbat kā fusūñ

āfat-e-qalb-o-jigar rāhat-e-jāñ hai jaise

aise lagtā hai ki is mai-kada-e-hastī meñ

ḳhūn-e-dil qismat-e-ā.alī-nafasāñ hai jaise

zarre zarre meñ ye arzānī-e-jalva kyā ḳhuub

koī mutalāshī-e-sāhab-nazarāñ hai jaise

ālam-e-husn hai yā husn-e-nazar kā aalam

nuur hī nuur ba-har-samt ravāñ hai jaise

aise itrāte haiñ arbāb-e-ḳhirad ai 'manshā'

un ke hī hāthoñ meñ tanzīm-e-jahāñ hai jaise

dil mein ek aatish-e-benam-o-nishan hai jaise

koi shoala sa rag-o-pai mein rawan hai jaise

allah allah re taqdis-e-mohabbat ka fusun

aafat-e-qalb-o-jigar rahat-e-jaan hai jaise

aise lagta hai ki is mai-kada-e-hasti mein

KHun-e-dil qismat-e-aali-nafasan hai jaise

zarre zarre mein ye arzani-e-jalwa kya KHub

koi mutalashi-e-sahab-nazaran hai jaise

aalam-e-husn hai ya husn-e-nazar ka aalam

nur hi nur ba-har-samt rawan hai jaise

aise itraate hain arbab-e-KHirad ai 'mansha'

un ke hi hathon mein tanzim-e-jahan hai jaise