دل میں اک آتش بے نام و نشاں ہے جیسے

دل میں اک آتش بے نام و نشاں ہے جیسے

کوئی شعلہ سا رگ و پے میں رواں ہے جیسے

اللہ اللہ رے تقدیس محبت کا فسوں

آفت قلب و جگر راحت جاں ہے جیسے

ایسے لگتا ہے کہ اس مے کدۂ ہستی میں

خون دل قسمت عالی نفساں ہے جیسے

ذرہ ذرہ میں یہ ارزانیٔ جلوہ کیا خوب

کوئی متلاشیٔ صاحب نظراں ہے جیسے

عالم حسن ہے یا حسن نظر کا عالم

نور ہی نور بہ ہر سمت رواں ہے جیسے

ایسے اتراتے ہیں ارباب خرد اے منشاؔ

ان کے ہی ہاتھوں میں تنظیم جہاں ہے جیسے