dil mein ek husn-e-tarah-dar ki ulfat bole

dil meñ ik husn-e-tarah-dār kī ulfat bole

bāñkpan bole mire sher kī nudrat bole

ye imārat kisī dīvāne kā ghar lagtī hai

ḳhastagī bole dar-o-bām kī hasrat bole

muskurāo ki ġhurūr-e-rah-e-zulmat ho tamām

gungunāo ki zarā rang-e-tabī.at bole

duur se rāhnumā.ī to baḌī baat nahīñ

saath aao ki taqāzā-e-rifāqat bole

zindagī dard-e-musalsal hai magar kyā kahiye

ḳhud-farebī kī adā is ko bhī rāhat bole

ye bhī ik turfa-tamāsha hai mirī jān-e-ġhazal

pyaar bole na tirī āñkhoñ meñ nafrat bole

tāzgī phūloñ ko kaliyoñ ko tabassum de de

partav-e-sub.h se shabnam kī latāfat bole

'nāzim'-e-ḳhasta kī kyā baat chalā.ī yaaro

vo to dīvāna hai har shai ko mohabbat bole

dil mein ek husn-e-tarah-dar ki ulfat bole

bankpan bole mere sher ki nudrat bole

ye imarat kisi diwane ka ghar lagti hai

KHastagi bole dar-o-baam ki hasrat bole

muskurao ki ghurur-e-rah-e-zulmat ho tamam

gungunao ki zara rang-e-tabiat bole

dur se rahnumai to baDi baat nahin

sath aao ki taqaza-e-rifaqat bole

zindagi dard-e-musalsal hai magar kya kahiye

KHud-farebi ki ada is ko bhi rahat bole

ye bhi ek turfa-tamasha hai meri jaan-e-ghazal

pyar bole na teri aankhon mein nafrat bole

tazgi phulon ko kaliyon ko tabassum de de

partaw-e-subh se shabnam ki latafat bole

'nazim'-e-KHasta ki kya baat chalai yaro

wo to diwana hai har shai ko mohabbat bole