دل میں جاگی ہوئی یادوں کو سلائے نہ بنے

دل میں جاگی ہوئی یادوں کو سلائے نہ بنے

نیند سے آنکھ کے گوشوں کو سجائے نہ بنے

جاں گسل ہیں ترے اعراض کے نشتر پھر بھی

چھوڑ کر در ترا مجھ سے کہیں جائے نہ بنے

دل ہے ناکام امیدوں کا لق و دق صحرا

آس کا پھول کوئی اس میں کھلائے نہ بنے

آہ جس غم نے کیا جیب شکیبائی چاک

دامن دل میں بھی اس غم کو چھپائے نہ بنے

ناتوانی کا یہ عالم ہے کہ اے جان حیات

بوجھ سانسوں کا بھی اب مجھ سے اٹھائے نہ بنے

مجھ سے تو آپ کے دیدار کے زمزم کے سوا

چاہ کی پیاس کسی طور بجھائے نہ بنے

دوستوں سے جو ملا کرتی ہے مجھ کو سوغات

اس کے بھی زخم زمانے کو دکھائے نہ بنے

میں نے جس پیڑ کو سینچا تھا لہو سے مقصودؔ

اس کے سائے مرے ارمان کے سائے نہ بنے