dil mein jagi hui yaadon ko sulae na bane

dil meñ jaagī huī yādoñ ko sulā.e na bane

niiñd se aañkh ke goshoñ ko sajā.e na bane

jāñ-gusil haiñ tire e'rāz ke nashtar phir bhī

chhoḌ kar dar tirā mujh se kahīñ jaa.e na bane

dil hai nākām umīdoñ kā laq-o-daq sahrā

aas kā phuul koī is meñ khilā.e na bane

aah jis ġham ne kiyā jeb-e-shakebā.ī chaak

dāman-e-dil meñ bhī us ġham ko chhupā.e na bane

nā-tavānī kā ye aalam hai ki ai jān-e-hayāt

bojh sāñsoñ kā bhī ab mujh se uThā.e na bane

mujh se to aap ke dīdār ke zamzam ke sivā

chaah kī pyaas kisī taur bujhā.e na bane

dostoñ se jo milā kartī hai mujh ko sauġhāt

us ke bhī zaḳhm zamāne ko dikhā.e na bane

maiñ ne jis peḌ ko sīñchā thā lahū se 'maqsūd'

us ke saa.e mire armān ke saa.e na bane

dil mein jagi hui yaadon ko sulae na bane

nind se aankh ke goshon ko sajae na bane

jaan-gusil hain tere e'raaz ke nashtar phir bhi

chhoD kar dar tera mujh se kahin jae na bane

dil hai nakaam umidon ka laq-o-daq sahra

aas ka phul koi is mein khilae na bane

aah jis gham ne kiya jeb-e-shakebai chaak

daman-e-dil mein bhi us gham ko chhupae na bane

na-tawani ka ye aalam hai ki ai jaan-e-hayat

bojh sanson ka bhi ab mujh se uThae na bane

mujh se to aap ke didar ke zamzam ke siwa

chah ki pyas kisi taur bujhae na bane

doston se jo mila karti hai mujh ko saughat

us ke bhi zaKHm zamane ko dikhae na bane

main ne jis peD ko sincha tha lahu se 'maqsud'

us ke sae mere arman ke sae na bane