dil mein jo ghuTan rahti thi kam ho to gai hai

dil meñ jo ghuTan rahtī thī kam ho to ga.ī hai

har aarzū mamnūn-e-karam ho to ga.ī hai

pahchān na pāoge kisī shaḳhs kī āvāz

har ek sadā zarb-e-sitam ho to ga.ī hai

ab kyuuñ ye havā dete haiñ afkār-e-pareshāñ

chingārī har ik sho.ala-e-ġham ho to ga.ī hai

kis kis kī taraf apnī nigāhoñ ko jamā.eñ

har shakl hī tasvīr-e-sanam ho to ga.ī hai

jis aañkh meñ mazbūt irādoñ kī chamak thī

is daur meñ vo aañkh bhī nam ho to ga.ī hai

shikva nahīñ tujh se koī ai gardish-e-daurāñ

mujh par bhī tirī chashm-e-karam ho to ga.ī hai

jis ḳhvāb kī ta.abīr sukūñ ho na ḳhushī ho

us ḳhvāb kī ta.abīr sitam ho to ga.ī hai

jo baat zabāñ par nahīñ aa.ī kabhī 'shāhid'

chehre pe vahī baat raqam ho to ga.ī hai

dil mein jo ghuTan rahti thi kam ho to gai hai

har aarzu mamnun-e-karam ho to gai hai

pahchan na paoge kisi shaKHs ki aawaz

har ek sada zarb-e-sitam ho to gai hai

ab kyun ye hawa dete hain afkar-e-pareshan

chingari har ek shoala-e-gham ho to gai hai

kis kis ki taraf apni nigahon ko jamaen

har shakl hi taswir-e-sanam ho to gai hai

jis aankh mein mazbut iradon ki chamak thi

is daur mein wo aankh bhi nam ho to gai hai

shikwa nahin tujh se koi ai gardish-e-dauran

mujh par bhi teri chashm-e-karam ho to gai hai

jis KHwab ki tabir sukun ho na KHushi ho

us KHwab ki tabir sitam ho to gai hai

jo baat zaban par nahin aai kabhi 'shahid'

chehre pe wahi baat raqam ho to gai hai