dil mein jo tasawwur hai teri zulf-e-rasa ka

dil meñ jo tasavvur hai tirī zulf-e-rasā kā

samjhā huuñ ise maiñ to amal radd-e-balā kā

duniyā meñ koī mujh sā gunahgār na hogā

maiñ ḳhaak kā putlā nahīñ putlā huuñ ḳhatā kā

jannat kī hai ummīd to dozaḳh kā hai khaTkā

dushvār hai maidān bahut bīm-o-rajā kā

hūrān-e-jināñ ne hameñ āñkhoñ pe biThāyā

dekhe to koī martaba tere shohdā kā

sāġhar kī tamannā hai na shīshe kī zarūrat

mastāna huuñ terī nigah-e-hosh-rubā kā

anvār-e-mohammad ke haiñ anvār-e-ilāhī

dīdār mohammad kā hai dīdār ḳhudā kā

ik raaz hai ye bhī ki tirī teġh kā paanī

chashma hai shahīdoñ ke liye āb-e-baqā kā

allāh ke mahbūb kī nazroñ meñ hai e.ajāz

siine meñ jo allāh kā ghar thā use taakā

be-ā.ī marūñ tum pe ki marnā hai muqaddar

kyuuñ muft meñ ehsān uThā.ūñ maiñ qazā kā

marqad meñ bhī ummat ko na bhūle shah-e-vālā

allāh-ġhanī dhyān hai kitnā ġhorabā kā

rauze pe kyā arz mirā hāl-e-pareshāñ

ehsān na bhūlūñgā kabhī bād-e-sabā kā

jis ḳhaak pe āshiq ne kiye sajdoñ pe sajde

ḳhāka thā vahāñ aap ke naqsh-e-kaf-e-pā kā

arbāb-e-karam phūlte-phalte haiñ hamesha

miltā hai samar un ko ġharīboñ kī duā kā

'rāsiḳh' kī zabāñ par ho dam-e-marg ye misra

mahbūb kī ummat meñ huuñ banda huuñ ḳhudā kā

dil mein jo tasawwur hai teri zulf-e-rasa ka

samjha hun ise main to amal radd-e-bala ka

duniya mein koi mujh sa gunahgar na hoga

main KHak ka putla nahin putla hun KHata ka

jannat ki hai ummid to dozaKH ka hai khaTka

dushwar hai maidan bahut bim-o-raja ka

huran-e-jinan ne hamein aankhon pe biThaya

dekhe to koi martaba tere shohda ka

saghar ki tamanna hai na shishe ki zarurat

mastana hun teri nigah-e-hosh-ruba ka

anwar-e-mohammad ke hain anwar-e-ilahi

didar mohammad ka hai didar KHuda ka

ek raaz hai ye bhi ki teri tegh ka pani

chashma hai shahidon ke liye aab-e-baqa ka

allah ke mahbub ki nazron mein hai eajaz

sine mein jo allah ka ghar tha use taka

be-ai marun tum pe ki marna hai muqaddar

kyun muft mein ehsan uThaun main qaza ka

marqad mein bhi ummat ko na bhule shah-e-wala

allah-ghani dhyan hai kitna ghoraba ka

rauze pe kya arz mera haal-e-pareshan

ehsan na bhulunga kabhi baad-e-saba ka

jis KHak pe aashiq ne kiye sajdon pe sajde

KHaka tha wahan aap ke naqsh-e-kaf-e-pa ka

arbab-e-karam phulte-phalte hain hamesha

milta hai samar un ko gharibon ki dua ka

'rasiKH' ki zaban par ho dam-e-marg ye misra

mahbub ki ummat mein hun banda hun KHuda ka