dil mein jo tha wo ho gaya mujhko suna ke chup

dil meñ jo thā vo ho gayā mujh ko sunā ke chup

sun kar huā huuñ us ko maiñ aañsū bahā ke chup

kahtā thā apnā haal maiñ tum ko sunā.ūñgā

na jaane kyoñ vo ho gayā aañsū bahā ke chup

maiñ ne to bevafā.ī kā chheḌā thā tazkira

muñh pe lagā ke uñglī phir us ne kahā ki chup

us kī kisī bhī baat kā matlab bhī kuchh nahīñ

ho jā.egā vo dekhnā ḳhud baḌbaḌā ke chup

ḳhāmoshiyoñ kī siskiyoñ meñ shor thā bahut

tanhā.iyoñ meñ ho gayā vo gungunā ke chup

kuchh din se apne aap se thā maiñ dukhī bahut

'irshād' ro ke ho gayā ḳhud ko hañsā ke chup

dil mein jo tha wo ho gaya mujh ko suna ke chup

sun kar hua hun us ko main aansu baha ke chup

kahta tha apna haal main tum ko sunaunga

na jaane kyon wo ho gaya aansu baha ke chup

main ne to bewafai ka chheDa tha tazkira

munh pe laga ke ungli phir us ne kaha ki chup

us ki kisi bhi baat ka matlab bhi kuchh nahin

ho jaega wo dekhna KHud baDbaDa ke chup

KHamoshiyon ki siskiyon mein shor tha bahut

tanhaiyon mein ho gaya wo gunguna ke chup

kuchh din se apne aap se tha main dukhi bahut

'irshad' ro ke ho gaya KHud ko hansa ke chup