دل میں کوئی بھنور کوئی طوفان بھی نہیں

دل میں کوئی بھنور کوئی طوفان بھی نہیں

تجھ سے بچھڑ کے اب کوئی ارمان بھی نہیں

دروازہ گھر کا بند کرو اور سو رہو

آنے کا اس کے اب کوئی امکان بھی نہیں

سچ بولنے کے جرم کی تنہائی ہے سزا

ہر شخص ورنہ شہر میں انجان بھی نہیں

ملتے ہیں ہم سے نت نئے چہرے بدل کے لوگ

ہم یہ تماشا دیکھ کے حیران بھی نہیں

کل رات محو فکر و سخن تھا کچھ اس طرح

کب آنکھ لگ گئی یہ مجھے دھیان بھی نہیں

حالات نے کیے ہیں جہانگیرؔ وہ ستم

اپنے لبوں پہ اب کوئی مسکان بھی نہیں