dil mein koi bhanwar koi tufan bhi nahin

dil meñ koī bhañvar koī tūfān bhī nahīñ

tujh se bichhaḌ ke ab koī armān bhī nahīñ

darvāza ghar kā band karo aur so raho

aane kā us ke ab koī imkān bhī nahīñ

sach bolne ke jurm kī tanhā.ī hai sazā

har shaḳhs varna shahr meñ anjān bhī nahīñ

milte haiñ ham se nit-na.e chehre badal ke log

ham ye tamāshā dekh ke hairān bhī nahīñ

kal raat mahv-e-fikr-o-suḳhan thā kuchh is tarah

kab aañkh lag ga.ī ye mujhe dhyān bhī nahīñ

hālāt ne kiye haiñ 'jahāñgīr' vo sitam

apne laboñ pe ab koī muskān bhī nahīñ

dil mein koi bhanwar koi tufan bhi nahin

tujh se bichhaD ke ab koi arman bhi nahin

darwaza ghar ka band karo aur so raho

aane ka us ke ab koi imkan bhi nahin

sach bolne ke jurm ki tanhai hai saza

har shaKHs warna shahr mein anjaan bhi nahin

milte hain hum se nit-nae chehre badal ke log

hum ye tamasha dekh ke hairan bhi nahin

kal raat mahw-e-fikr-o-suKHan tha kuchh is tarah

kab aankh lag gai ye mujhe dhyan bhi nahin

haalat ne kiye hain 'jahangir' wo sitam

apne labon pe ab koi muskan bhi nahin