دل میں مرے سکون کا امکان کیا ہی ہو

دل میں مرے سکون کا امکان کیا ہی ہو

شاعر ہوں زندگی مری آسان کیا ہی ہو

جب تک میں ان کہی کو کہی میں بدل نہ دوں

میرے کلام سے مری پہچان کیا ہی ہو

جو کھیل کھیلنے کو کھلاڑی نہیں کوئی

اس کھیل کے لیے کوئی میدان کیا ہی ہو

جس کے لیے ضمیر تجارت کی چیز ہے

اس شخص سے وضاحت ایمان کیا ہی ہو

جانے ہے فکر کیوں مجھے خوابوں کے شہر کی

جو بس نہیں سکا کبھی ویران کیا ہی ہو

بھگوان کیا ہی ہو کوئی انسان سے الگ

انسان سے بڑا کوئی شیطان کیا ہی ہو