dil mein mere sukun ka imkan kya hi ho

dil meñ mire sukūn kā imkān kyā hī ho

shā'ir huuñ zindagī mirī āsān kyā hī ho

jab tak maiñ an-kahī ko kahī meñ badal na duuñ

mere kalām se mirī pahchān kyā hī ho

jo khel khelne ko khilāḌī nahīñ koī

us khel ke liye koī maidān kyā hī ho

jis ke liye zamīr tijārat kī chiiz hai

us shaḳhs se vazāhat-e-īmān kyā hī ho

jaane hai fikr kyoñ mujhe ḳhvāboñ ke shahr kī

jo bas nahīñ sakā kabhī vīrān kyā hī ho

bhagvān kyā hī ho koī insān se alag

insān se baḌā koī shaitān kyā hī ho

dil mein mere sukun ka imkan kya hi ho

sha'ir hun zindagi meri aasan kya hi ho

jab tak main an-kahi ko kahi mein badal na dun

mere kalam se meri pahchan kya hi ho

jo khel khelne ko khilaDi nahin koi

us khel ke liye koi maidan kya hi ho

jis ke liye zamir tijarat ki chiz hai

us shaKHs se wazahat-e-iman kya hi ho

jaane hai fikr kyon mujhe KHwabon ke shahr ki

jo bas nahin saka kabhi viran kya hi ho

bhagwan kya hi ho koi insan se alag

insan se baDa koi shaitan kya hi ho