دل میں پیوست کوئی ڈر ہے میاں

دل میں پیوست کوئی ڈر ہے میاں

راستہ ویسے بے خطر ہے میاں

کیوں صدا دے رہے ہو سورج کو

دور ہم سے ابھی سحر ہے میاں

زندگی کیا ہے پوچھتے کیوں ہو

چند لمحوں کا یہ سفر ہے میاں

درمیاں ہے انا کی اک دیوار

فاصلہ ورنہ مختصر ہے میاں

بات اتنی سی ہے کہ دنیا میں

آدمی خود سے بے خبر ہے میاں

تم حقیقت کی بات کرتے ہو

یہ تو خوابوں کی رہ گزر ہے میاں

آئے ہو اس طرف تو ساتھ چلو

دو قدم پر ہمارا گھر ہے میاں

حال کیسے بیاں کرو خالدؔ

زندگی اپنی در بہ در ہے میاں