dil mein prit basai jab se maine kisi harjai ki

dil meñ priit basā.ī jab se maiñ ne kisī harjā.ī kī

kūche kūche phail ga.ī hai baat mirī rusvā.ī kī

taare barsā.eñ angāre kirneñ tiir chalātī haiñ

nāgin ban kar Das letī hai dil ko raat judā.ī kī

jaltā ho jangal meñ jaise peḌ mahaktā chandan kā

phūñk rahī hai aise mujh ko aag mirī tanhā.ī kī

jin kī ḳhātir duniyā chhoḌī galī galī badnām hue

vo kahte haiñ ham na suneñge baat kisī saudā.ī kī

bhūle sapne bisrī yādeñ āñkhoñ meñ phir jaatī haiñ

so.e dard jagā detī hai le sautan shahnā.ī kī

kaun sune singār kī bāteñ nain kī bolī samjhe kaun

nir-mohī bin tere kahānī kaun kahe añgḌā.ī kī

tere naam kā diip jalāyā man kī suunī nagrī meñ

pyaar se maiñ ne maañg meñ bhar lī dhuul tirī añgnā.ī kī

shaam ke man meñ kaun basā hai ye to shaam hī jaane hai

rādhā ke nainan meñ basī hai sūrat shaam kanhā.ī kī

dil mein prit basai jab se main ne kisi harjai ki

kuche kuche phail gai hai baat meri ruswai ki

tare barsaen angare kirnen tir chalati hain

nagin ban kar Das leti hai dil ko raat judai ki

jalta ho jangal mein jaise peD mahakta chandan ka

phunk rahi hai aise mujh ko aag meri tanhai ki

jin ki KHatir duniya chhoDi gali gali badnam hue

wo kahte hain hum na sunenge baat kisi saudai ki

bhule sapne bisri yaaden aankhon mein phir jati hain

soe dard jaga deti hai le sautan shahnai ki

kaun sune singar ki baaten nain ki boli samjhe kaun

nir-mohi bin tere kahani kaun kahe angDai ki

tere nam ka dip jalaya man ki suni nagri mein

pyar se main ne mang mein bhar li dhul teri angnai ki

sham ke man mein kaun basa hai ye to sham hi jaane hai

radha ke nainan mein basi hai surat sham kanhai ki