dil mein rah jate hain sab log bhulane wale

dil meñ rah jaate haiñ sab log bhulāne vaale

ham haiñ har haal meñ rishtoñ ko nibhāne vaale

kyā koī rang hai jo mujh ko mukammal kar de

merī tasvīr ko rangoñ se sajāne vaale

ham ne tā-'umr tujhe man meñ basā.e rakkhā

ranj to aur bhī the dil se lagāne vaale

aisā lagtā thā mujhe kho ke badal jā.egā

aaj bhī us ke haiñ andāz purāne vaale

merī pahchān to duniyā meñ thī tujh se lekin

ab na.e Dhang se jāneñge zamāne vaale

mujh ko jaanā hai kisī aur hī manzil kī taraf

ab mujhe yaad na kar chhoḌ ke jaane vaale

maiñ ne is vāste is aag ko bujhne na diyā

mere apne the mujhe zinda jalāne vaale

dil mein rah jate hain sab log bhulane wale

hum hain har haal mein rishton ko nibhane wale

kya koi rang hai jo mujh ko mukammal kar de

meri taswir ko rangon se sajaane wale

hum ne ta-'umr tujhe man mein basae rakkha

ranj to aur bhi the dil se lagane wale

aisa lagta tha mujhe kho ke badal jaega

aaj bhi us ke hain andaz purane wale

meri pahchan to duniya mein thi tujh se lekin

ab nae Dhang se jaanenge zamane wale

mujh ko jaana hai kisi aur hi manzil ki taraf

ab mujhe yaad na kar chhoD ke jaane wale

main ne is waste is aag ko bujhne na diya

mere apne the mujhe zinda jalane wale