dil mein rahe wo shaKHs ragon mein rawan na ho

dil meñ rahe vo shaḳhs ragoñ meñ ravāñ na ho

maiñ chāhtā huuñ zaḳhm-e-jigar kā nishāñ na ho

dastak sunī to ruuh kī chīḳheñ nikal ga.iiñ

jaise koī badan meñ jahāñ thā vahāñ na ho

ik umr ho ki jis meñ mayassar hoñ cigareteñ

ik dostī ho jis meñ ye sūd-o-ziyāñ na ho

ik ḳhush-kalām pūchhe tumheñ chāhiye sukūñ

ik ḳhush-kalām pūchhe magar mujh se haañ na ho

maiñ chāhtā huuñ ek ho bas ek ham-safar

aisā jo mere dil kī tarah bad-zabāñ na ho

dil mein rahe wo shaKHs ragon mein rawan na ho

main chahta hun zaKHm-e-jigar ka nishan na ho

dastak suni to ruh ki chiKHen nikal gain

jaise koi badan mein jahan tha wahan na ho

ek umr ho ki jis mein mayassar hon cigareten

ek dosti ho jis mein ye sud-o-ziyan na ho

ek KHush-kalam puchhe tumhein chahiye sukun

ek KHush-kalam puchhe magar mujh se han na ho

main chahta hun ek ho bas ek ham-safar

aisa jo mere dil ki tarah bad-zaban na ho