dil mein rahta hai koi dil hi ki KHatir KHamosh

dil meñ rahtā hai koī dil hī kī ḳhātir ḳhāmosh

jaise tasvīr meñ baiThā ho musavvir ḳhāmosh

dil kī ḳhāmoshī se ghabrā ke uThātā huuñ nazar

ek āvāz sī aatī hai musāfir ḳhāmosh

is ta.āruf kā na āġhāz na anjām koī

kar diyā ek ḳhamoshī ne mujhe phir ḳhāmosh

kuchh na sun kar bhī to kahnā hai ki haañ sunte haiñ

kuchh na kah kar bhī to honā hai bil-āḳhir ḳhāmosh

Duub saktī hai ye kashtī tirī sargoshī se

ai mire ḳhvāb mire hāmī-o-nāsir ḳhāmosh

chyūñTiyāñ reñg rahī haiñ kahīñ andar 'ādil'

ham haiñ dīvār ke mānind ba-zāhir ḳhāmosh

dil mein rahta hai koi dil hi ki KHatir KHamosh

jaise taswir mein baiTha ho musawwir KHamosh

dil ki KHamoshi se ghabra ke uThata hun nazar

ek aawaz si aati hai musafir KHamosh

is taaruf ka na aaghaz na anjam koi

kar diya ek KHamoshi ne mujhe phir KHamosh

kuchh na sun kar bhi to kahna hai ki han sunte hain

kuchh na kah kar bhi to hona hai bil-aKHir KHamosh

Dub sakti hai ye kashti teri sargoshi se

ai mere KHwab mere hami-o-nasir KHamosh

chyunTiyan reng rahi hain kahin andar 'adil'

hum hain diwar ke manind ba-zahir KHamosh