dil mein rumuz-e-ishq ka daftar liye hue

dil meñ rumūz-e-'ishq kā daftar liye hue

kuuze meñ phir rahā huuñ samundar liye hue

aise hī bal hai merā muqaddar liye hue

jaise ki un kī zulf-e-mo'ambar liye hue

kyā ḳhaak aa.ine meñ nazar aa.e rū-e-dost

dil hai ḳhudī kī gard-e-mukaddar liye hue

sadqe tire qazā ki subuk-dosh kar diyā

bār-e-gunah thā bhārī maiñ sar par liye hue

hirs-o-havā ke phandoñ meñ har dam phañse hue

kitne vabāl-e-jāñ haiñ tavangar liye hue

ḳhail-o-hasham ko dekh ke dozaḳh bhī kaañp uThā

pahuñchā jo maiñ gunāhoñ kā lashkar liye hue

khaTkā na jaan kā hai na kuchh fikr maal kī

saarī tasalliyāñ haiñ gadāgar liye hue

ārāsta hai durr-e-ma.ānī se sar-basar

'jauhar' ġhazal ye tābish-e-jauhar liye hue

dil mein rumuz-e-'ishq ka daftar liye hue

kuze mein phir raha hun samundar liye hue

aise hi bal hai mera muqaddar liye hue

jaise ki un ki zulf-e-mo'ambar liye hue

kya KHak aaine mein nazar aae ru-e-dost

dil hai KHudi ki gard-e-mukaddar liye hue

sadqe tere qaza ki subuk-dosh kar diya

bar-e-gunah tha bhaari main sar par liye hue

hirs-o-hawa ke phandon mein har dam phanse hue

kitne wabaal-e-jaan hain tawangar liye hue

KHail-o-hasham ko dekh ke dozaKH bhi kanp uTha

pahuncha jo main gunahon ka lashkar liye hue

khaTka na jaan ka hai na kuchh fikr mal ki

sari tasalliyan hain gadagar liye hue

aarasta hai durr-e-maani se sar-basar

'jauhar' ghazal ye tabish-e-jauhar liye hue