dil mein taswir teri aankh mein aasar tere

dil meñ tasvīr tirī aañkh meñ āsār tire

zaḳhm hāthoñ meñ liye phirte haiñ bīmār tire

ai shab-e-ranj-o-alam dekh zarā rahm to kar

aah kis karb meñ rahte haiñ azādār tire

zo'm hai tujh ko agar apne qabīle pe to sun

mere qadmoñ meñ gire the kabhī sardār tire

aaj bāzār meñ laa.ī ga.ī jab terī shabīh

bhāgte dauḌte aa pahuñche ḳharīdār tire

sāmne kyuuñ tirī ismat pe uThī hai uñglī

kyoñ ye charche haiñ musalsal pas-e-dīvār tire

in ke dukh-dard kā tujh se bhī mudāvā na huā

apnī hālat pe jo hañste rahe fankār tire

mujh se phir chhuTte hue abr-e-alam ne ye kahā

aaj kī shaam palaT ā.eñge ġham-ḳhvār tire

jaane kyā rañg 'rabāb' ab unheñ degī duniyā

kis qadar dard se labrez haiñ ash'ār tire

dil mein taswir teri aankh mein aasar tere

zaKHm hathon mein liye phirte hain bimar tere

ai shab-e-ranj-o-alam dekh zara rahm to kar

aah kis karb mein rahte hain azadar tere

zo'm hai tujh ko agar apne qabile pe to sun

mere qadmon mein gire the kabhi sardar tere

aaj bazar mein lai gai jab teri shabih

bhagte dauDte aa pahunche KHaridar tere

samne kyun teri ismat pe uThi hai ungli

kyon ye charche hain musalsal pas-e-diwar tere

in ke dukh-dard ka tujh se bhi mudawa na hua

apni haalat pe jo hanste rahe fankar tere

mujh se phir chhuTte hue abr-e-alam ne ye kaha

aaj ki sham palaT aaenge gham-KHwar tere

jaane kya rang 'rabab' ab unhen degi duniya

kis qadar dard se labrez hain ash'ar tere