dil mein tere jo koi ghar kar gaya

dil meñ tire jo koī ghar kar gayā

saḳht muhim thī ki vo sar kar gayā

vahm-e-ġhalat-kār ne dil ḳhush kiyā

kis pe na jaane vo nazar kar gayā

jā hī bhiḌā tujh saf-e-mizhgāñ se yaar

dil to mirā zor-e-jigar kar gayā

raat milā thā mujhe tanhā raqīb

yaar ḳhudā kā hī maiñ Dar kar gayā

faiz tire vasf-e-bunā-gosh kā

apne suḳhan ko to guhar kar gayā

dekh lī saaqī kī bhī dariyā-dilī

lab na hamāre kabhū tar kar gayā

kyuuñ ke karāhūñ na shab o roz meñ

dard mire pahlū meñ ghar kar gayā

naf.a ko pahuñchā ye tujhe de ke dil

jaan kā apnī meñ zarar kar gayā

aur ġhazal ab koī saudā tū kah

ye to yūñhī thī maiñ nazar kar gayā

dil mein tere jo koi ghar kar gaya

saKHt muhim thi ki wo sar kar gaya

wahm-e-ghalat-kar ne dil KHush kiya

kis pe na jaane wo nazar kar gaya

ja hi bhiDa tujh saf-e-mizhgan se yar

dil to mera zor-e-jigar kar gaya

raat mila tha mujhe tanha raqib

yar KHuda ka hi main Dar kar gaya

faiz tere wasf-e-buna-gosh ka

apne suKHan ko to guhar kar gaya

dekh li saqi ki bhi dariya-dili

lab na hamare kabhu tar kar gaya

kyun ke karahun na shab o roz mein

dard mere pahlu mein ghar kar gaya

nafa ko pahuncha ye tujhe de ke dil

jaan ka apni mein zarar kar gaya

aur ghazal ab koi sauda tu kah

ye to yunhi thi main nazar kar gaya