dil mein tere KHayal ki duniya liye hue

dil meñ tire ḳhayāl kī duniyā liye hue

baiThā huuñ ek kuuze meñ dariyā liye hue

jis meñ na zindagī kā sukūñ hai na kaifiyat

kuchh log ḳhush haiñ aisā saverā liye hue

yā-rab ġhurūr-e-zabt-e-mohabbat kī ḳhair ho

āñkheñ haiñ ik thamā huā dariyā liye hue

faiz-e-bahār-o-jashn-e-charāġhāñ ke bāvajūd

kuchh rāste haiñ ab bhī añdherā liye hue

ta.amīr-e-qasr-e-nau kī tamanna bajā magar

ḳhud shīshagar hai haath meñ tesha liye hue

jab bhī us anjuman meñ ga.e haiñ ham ai 'nihāl'

peshāniyāñ milī haiñ pasīna liye hue

dil mein tere KHayal ki duniya liye hue

baiTha hun ek kuze mein dariya liye hue

jis mein na zindagi ka sukun hai na kaifiyat

kuchh log KHush hain aisa sawera liye hue

ya-rab ghurur-e-zabt-e-mohabbat ki KHair ho

aankhen hain ek thama hua dariya liye hue

faiz-e-bahaar-o-jashn-e-charaghan ke bawajud

kuchh raste hain ab bhi andhera liye hue

tamir-e-qasr-e-nau ki tamanna baja magar

KHud shishagar hai hath mein tesha liye hue

jab bhi us anjuman mein gae hain hum ai 'nihaal'

peshaniyan mili hain pasina liye hue