dil mein tufan uThate hue jazbaat bhi hain

dil meñ tūfān uThāte hue jazbāt bhī haiñ

ham haiñ ḳhāmosh ki kuchh apnī rivāyāt bhī haiñ

mohtasib hī se nahīñ nāla-ba-lab jām-o-subū

sañg uThā.e hue ḳhud ahl-e-ḳharābāt bhī haiñ

mastiyoñ meñ kabhī mil jaate haiñ insāñ ab bhī

jaise sahrāoñ meñ shādāb maqāmāt bhī haiñ

dekhiye mujh se vo kab aa ke gale miltā hai

the jo mere vahī ab ġhair ke hālāt bhī haiñ

ashk hī ashk nahīñ ġhaur se dekhoge agar

in sulagtī huī āñkhoñ meñ hikāyāt bhī haiñ

un ke dāman pe lahū kis ko yaqīñ aa.egā

jin ke chehroñ pe taqaddus kī alāmāt bhī haiñ

kyā kahīñ kaun sī rāhoñ meñ haiñ pāmāl 'karam'

ham ki zinda haiñ magar kushta-hālāt bhī haiñ

dil mein tufan uThate hue jazbaat bhi hain

hum hain KHamosh ki kuchh apni riwayat bhi hain

mohtasib hi se nahin nala-ba-lab jam-o-subu

sang uThae hue KHud ahl-e-KHarabaat bhi hain

mastiyon mein kabhi mil jate hain insan ab bhi

jaise sahraon mein shadab maqamat bhi hain

dekhiye mujh se wo kab aa ke gale milta hai

the jo mere wahi ab ghair ke haalat bhi hain

ashk hi ashk nahin ghaur se dekhoge agar

in sulagti hui aankhon mein hikayat bhi hain

un ke daman pe lahu kis ko yaqin aaega

jin ke chehron pe taqaddus ki alamat bhi hain

kya kahin kaun si rahon mein hain pamal 'karam'

hum ki zinda hain magar kushta-haalat bhi hain