دل میں وہ تھے دل تھا روشن اب خدا کا نام ہے

دل میں وہ تھے دل تھا روشن اب خدا کا نام ہے

وہ تھا آغاز محبت اور یہ انجام ہے

ضبط غم کا سلسلہ اب جزو ہستی بن گیا

چاہے جو کچھ بھی کریں وہ میرے سر الزام ہے

بستر گل پر جو محو خواب ہیں وہ جانیں کیا

زندگی خار الم ہے تیغ خوں آشام ہے

حسن کو سنجاب و مخمل عشق کو جامہ دری

بارگاہ حق سے الفت کا یہی انعام ہے

خام ہے جس کا شعور زندگی جانے وہ کیا

ہر حسیں شے میں خوشی کا آج بھی پیغام ہے

جلوہ ہائے رنگ و بو کیا دعوت فکر و نظر

زندگی کیا ہے مسلسل جستجو کا نام ہے

خون جب غنچوں کا ہوتا ہے تو کھلتے ہیں گلاب

پردۂ تخریب میں تعمیر کا پیغام ہے

چشم انساں میں ہوئی تقدیر عالم بے حجاب

مرکز تسخیر اب تو چرخ نیلی فام ہے

زندگی کا راز کیا ہے یا فنا کیا چیز ہے

تو پیامیؔ رمز سمجھے یہ خیال خام ہے