دل مرا مائل فغاں نہ ہوا

دل مرا مائل فغاں نہ ہوا

آگ جلتی رہی دھواں نہ ہوا

مجھ سے اپنا بھی غم بیاں نہ ہوا

درد شرمندۂ زباں نہ ہوا

ہم زمانے کو کوستے ہی رہے

اپنے کردار پر گماں نہ ہوا

لاکھ زیبائش قفس تو کی

یہ قفس پھر بھی آشیاں نہ ہوا

آخر ان کو بھی میری یاد آئی

درد دل میرا رائیگاں نہ ہوا

قصۂ درد روبرو ان کے

فرط جذبات میں بیاں نہ ہوا

جو ملائک سے بار غم نہ اٹھا

دل انساں پہ وہ گراں نہ ہوا

ایک آنسو نے کہہ دیا جو کچھ

سو زباں سے بھی وہ بیاں نہ ہوا