dil mera mail-e-fughan na hua

dil mirā mā.il-e-fuġhāñ na huā

aag jaltī rahī dhuāñ na huā

mujh se apnā bhī ġham bayāñ na huā

dard sharminda-e-zabāñ na huā

ham zamāne ko koste hī rahe

apne kirdār par gumāñ na huā

laakh zebā.ish-e-qafas to kī

ye qafas phir bhī āshiyāñ na huā

āḳhir un ko bhī merī yaad aa.ī

dard-e-dil merā rā.egāñ na huā

qissa-e-dard rū-ba-rū un ke

fart-e-jazbāt meñ bayāñ na huā

jo malā.ik se bār-e-ġham na uThā

dil-e-insāñ pe vo girāñ na huā

ek aañsū ne kah diyā jo kuchh

sau zabāñ se bhī vo bayāñ na huā

dil mera mail-e-fughan na hua

aag jalti rahi dhuan na hua

mujh se apna bhi gham bayan na hua

dard sharminda-e-zaban na hua

hum zamane ko koste hi rahe

apne kirdar par guman na hua

lakh zebaish-e-qafas to ki

ye qafas phir bhi aashiyan na hua

aaKHir un ko bhi meri yaad aai

dard-e-dil mera raegan na hua

qissa-e-dard ru-ba-ru un ke

fart-e-jazbaat mein bayan na hua

jo malaik se bar-e-gham na uTha

dil-e-insan pe wo giran na hua

ek aansu ne kah diya jo kuchh

sau zaban se bhi wo bayan na hua