dil mera jab tak kisi ke husn par mail na tha

dil mirā jab tak kisī ke husn par maa.il na thā

zindagī meñ zindagī kā lutf kuchh hāsil na thā

mere hisse kā koī sāġhar sar-e-mahfil na thā

tere mai-noshoñ meñ saaqī kyā maiñ is qābil na thā

jāñ-ba-lab mahfil meñ un kī maiñ na thā yā dil na thā

kaun thā jo un ke tīr-e-nāz kā ghā.il na thā

ik nazar milte hī un kā ho gayā kyā qahr hai

jis ko ham samajhte the apnā dil vo apnā dil na thā

bahr-e-ulfat kī talātum-ḳhez tuġhyānī na pūchh

har taraf tūfān hī tūfān hai sāhil na thā

nā-umīdī dard-o-ġham ranj-o-musībat ke sivā

chāhne vāloñ ko un ke aur kuchh hāsil na thā

ik ishāre par bahāyā ḳhuun paanī kī tarah

un ke jāñ-bāzoñ meñ koī mujh sā dariyā-dil na thā

sahl kar dī zindagī un kī umīd-e-dīd ne

varna un ke hijr meñ marnā koī mushkil na thā

aah 'sābir' jab huā merā safīna ġharq-e-āb

maiñ thā majbūrī thī aur koī lab-e-sāhil na thā

dil mera jab tak kisi ke husn par mail na tha

zindagi mein zindagi ka lutf kuchh hasil na tha

mere hisse ka koi saghar sar-e-mahfil na tha

tere mai-noshon mein saqi kya main is qabil na tha

jaan-ba-lab mahfil mein un ki main na tha ya dil na tha

kaun tha jo un ke tir-e-naz ka ghail na tha

ek nazar milte hi un ka ho gaya kya qahr hai

jis ko hum samajhte the apna dil wo apna dil na tha

bahr-e-ulfat ki talatum-KHez tughyani na puchh

har taraf tufan hi tufan hai sahil na tha

na-umidi dard-o-gham ranj-o-musibat ke siwa

chahne walon ko un ke aur kuchh hasil na tha

ek ishaare par bahaya KHun pani ki tarah

un ke jaan-bazon mein koi mujh sa dariya-dil na tha

sahl kar di zindagi un ki umid-e-did ne

warna un ke hijr mein marna koi mushkil na tha

aah 'sabir' jab hua mera safina gharq-e-ab

main tha majburi thi aur koi lab-e-sahil na tha