dil mera luT gaya wo baDi tauqir ke sath

dil mirā luuT gayā vo baḌī tauqīr ke saath

jo mujhe jiit na paayā kabhī shamshīr ke saath

koī kis tarah se badlegā muqaddar kā likhā

koī kis tarah se laḌ pā.egā taqdīr ke saath

dil kī nagrī se ka.ī ek musāfir guzre

koī Thahrā hī nahīñ hai dil-e-be-pīr ke saath

dard jab had se guzar jaa.e to kuchh baat bane

naam merā bhī kabhī aa.e taqī-'mīr' ke saath

maiñ use bhuul ke bhī yaad nahīñ aa saktī

jo mujhe bāñdh gayā dard kī zanjīr ke saath

maiñ ne minnat se aur minnat se tumheñ māñgā hai

tum jo mil sakte the mujh ko kisī tadbīr ke saath

ye hī alfāz mirī shaan haiñ sarmāya haiñ

kuchh taqābul nahīñ in kā kisī jāgīr ke saath

kaaT kar aaj ke aḳhbār ko ta.avīz kiyā

terī tasvīr chhapī hai tirī tahrīr ke saath

tujh ko rāñjhā se kabhī bhī koī nisbat na rahī

har fasāne meñ mirā zikr chalā hiir ke saath

aap pahlū se yuuñ chup-chāp lage baiThe haiñ

jaise tasvīr lagā de koī tasvīr ke saath

daad miltī hai 'tabassum' tujhe yuuñ der ke baa'd

tere ash.ār samajh aate haiñ tāḳhīr ke saath

dil mera luT gaya wo baDi tauqir ke sath

jo mujhe jit na paya kabhi shamshir ke sath

koi kis tarah se badlega muqaddar ka likha

koi kis tarah se laD paega taqdir ke sath

dil ki nagri se kai ek musafir guzre

koi Thahra hi nahin hai dil-e-be-pir ke sath

dard jab had se guzar jae to kuchh baat bane

nam mera bhi kabhi aae taqi-'mir' ke sath

main use bhul ke bhi yaad nahin aa sakti

jo mujhe bandh gaya dard ki zanjir ke sath

main ne minnat se aur minnat se tumhein manga hai

tum jo mil sakte the mujh ko kisi tadbir ke sath

ye hi alfaz meri shan hain sarmaya hain

kuchh taqabul nahin in ka kisi jagir ke sath

kaT kar aaj ke aKHbar ko tawiz kiya

teri taswir chhapi hai teri tahrir ke sath

tujh ko ranjha se kabhi bhi koi nisbat na rahi

har fasane mein mera zikr chala hir ke sath

aap pahlu se yun chup-chap lage baiThe hain

jaise taswir laga de koi taswir ke sath

dad milti hai 'tabassum' tujhe yun der ke ba'd

tere ashaar samajh aate hain taKHir ke sath