dil mera soz-e-nihan se umr bhar betab tha

dil mirā soz-e-nihāñ se umr bhar betāb thā

kashti-e-dil kā muqaddar pur-ḳhatar girdāb thā

vaañ ki aariz surḳh thā rañg-e-tilā-e-nāb se

yaañ vufūr-e-ashk se mizhgāñ mirā sīmāb thā

jaise khoje kāfiroñ meñ nik.hat-e-īmāñ koī

hāsil-e-haq is jahāñ meñ is qadar nāyāb thā

vaañ ki us ko niiñd misl-e-maġhfirat hāsil rahī

yaañ koī āzurdagī se tā-qazā be-ḳhvāb thā

jab likhā dil kā fasāna bah gayā kāġhaz kahīñ

ashk the itne ravāñ merā qalam pur-āb thā

sher aise kah ke bhī hāsil mirā gum-nām hai

varna merā ye hunar to qābil-e-alqāb thā

dil mera soz-e-nihan se umr bhar betab tha

kashti-e-dil ka muqaddar pur-KHatar girdab tha

wan ki aariz surKH tha rang-e-tila-e-nab se

yan wufur-e-ashk se mizhgan mera simab tha

jaise khoje kafiron mein nikhat-e-iman koi

hasil-e-haq is jahan mein is qadar nayab tha

wan ki us ko nind misl-e-maghfirat hasil rahi

yan koi aazurdagi se ta-qaza be-KHwab tha

jab likha dil ka fasana bah gaya kaghaz kahin

ashk the itne rawan mera qalam pur-ab tha

sher aise kah ke bhi hasil mera gum-nam hai

warna mera ye hunar to qabil-e-alqab tha