dil mera tir-e-sitamgar ka nishana ho gaya

dil mirā tīr-e-sitamgar kā nishāna ho gayā

āfat-e-jāñ mere haq meñ dil lagānā ho gayā

ho gayā lāġhar jo us lailā-adā ke 'ishq meñ

misl-e-majnūñ haal merā bhī fasāna ho gayā

ḳhāksārī ne dikhāyā bā'd-e-murdan bhī 'urūj

āsmāñ turbat par mere shāmiyāna ho gayā

ḳhvāb-e-ġhaflat se zarā dekho to kab chauñke haiñ ham

qāfila mulk-e-adam ko jab ravāna ho gayā

fasl-e-gul meñ bhī rihā.ī kī na kuchh sūrat huī

qaid meñ sayyād mujh ko ik zamāna ho gayā

dil jalāyā sūrat-e-parvāna jab se 'ishq meñ

farz tab se sham' par aañsū bahāna ho gayā

aaj tak ai dil javāb-e-ḳhat na bhejā yaar ne

nāma-bar ko bhī ga.e kitnā zamāna ho gayā

pās-e-rusvā.ī se dekho paas aa sakte nahīñ

raat aa.ī niiñd kā tum ko bahāna ho gayā

ho pareshānī sar-e-mū bhī na zulf-e-yār ko

is liye merā dil-e-sad-chāk shāna ho gayā

baa'd murdan kaun aatā hai ḳhabar ko ai 'rasā'

ḳhatm bas kunj-e-lahad tak dostāna ho gayā

dil mera tir-e-sitamgar ka nishana ho gaya

aafat-e-jaan mere haq mein dil lagana ho gaya

ho gaya laghar jo us laila-ada ke 'ishq mein

misl-e-majnun haal mera bhi fasana ho gaya

KHaksari ne dikhaya ba'd-e-murdan bhi 'uruj

aasman turbat par mere shamiyana ho gaya

KHwab-e-ghaflat se zara dekho to kab chaunke hain hum

qafila mulk-e-adam ko jab rawana ho gaya

fasl-e-gul mein bhi rihai ki na kuchh surat hui

qaid mein sayyaad mujh ko ek zamana ho gaya

dil jalaya surat-e-parwana jab se 'ishq mein

farz tab se sham' par aansu bahana ho gaya

aaj tak ai dil jawab-e-KHat na bheja yar ne

nama-bar ko bhi gae kitna zamana ho gaya

pas-e-ruswai se dekho pas aa sakte nahin

raat aai nind ka tum ko bahana ho gaya

ho pareshani sar-e-mu bhi na zulf-e-yar ko

is liye mera dil-e-sad-chaak shana ho gaya

ba'd murdan kaun aata hai KHabar ko ai 'rasa'

KHatm bas kunj-e-lahad tak dostana ho gaya