dil mera us shaKHs ki jagir hai

dil mirā us shaḳhs kī jāgīr hai

jis ke aane meñ abhī tāḳhīr hai

shaan se jiitā huuñ jo maiñ zindagī

ye mire ajdād kī tāsīr hai

asl meñ dekhā gayā to zindagī

bas hamārī maut kī tahrīr hai

dil mirā yuuñ hī nahīñ ghāyal huā

kuchh tumhārī bhī nazar meñ tiir hai

aadmī ye kaam kā hai sochnā

ye bhī to ik soch kī tā'mīr hai

maiñ jise samjhā thā apnā ham-safar

der se bolā ki bas rahgīr hai

aaj ke insān ko dekho zarā

har kisī ke pair meñ zanjīr hai

ye zamāna kis taraf baḌhne lagā

us taraf tā’zīr hī tā'zīr hai

maiñ hathelī par liye ik ḳhvāb ko

jā rahā huuñ jis taraf tā'bīr hai

dil mera us shaKHs ki jagir hai

jis ke aane mein abhi taKHir hai

shan se jita hun jo main zindagi

ye mere ajdad ki tasir hai

asl mein dekha gaya to zindagi

bas hamari maut ki tahrir hai

dil mera yun hi nahin ghayal hua

kuchh tumhaari bhi nazar mein tir hai

aadmi ye kaam ka hai sochna

ye bhi to ek soch ki ta'mir hai

main jise samjha tha apna ham-safar

der se bola ki bas rahgir hai

aaj ke insan ko dekho zara

har kisi ke pair mein zanjir hai

ye zamana kis taraf baDhne laga

us taraf ta’zir hi ta'zir hai

main hatheli par liye ek KHwab ko

ja raha hun jis taraf ta'bir hai