dil miT gaya to KHair zarurat nahin rahi

dil miT gayā to ḳhair zarūrat nahīñ rahī

hasrat ye rah ga.ī hai ki hasrat nahīñ rahī

ye dil badal gayā ki zamāna badal gayā

yā terī aañkh meñ vo muravvat nahīñ rahī

terī nazar ke saath badaltā rahā hai dil

do roz bhī to ek sī hālat nahīñ rahī

tar-dāmanī se haath na dho ai dil-e-hazīñ

kyā ab ḳhudā kī josh pe rahmat nahīñ rahī

dekhegā ḳhvāb meñ bhī na vo sūrat-e-sukūñ

jis ko ḳhudā se chashm-e-ināyat nahīñ rahī

un kī galī nahīñ hai na un kā harīm hai

jannat bhī mere vāste jannat nahīñ rahī

kis shab taḌap taḌap ke na kaaTī tamām shab

kis roz mere ghar pe qayāmat nahīñ rahī

'nādir' na aa.e harf tumhārī zabān par

vo sher kyā hai jis meñ fasāhat nahīñ rahī

dil miT gaya to KHair zarurat nahin rahi

hasrat ye rah gai hai ki hasrat nahin rahi

ye dil badal gaya ki zamana badal gaya

ya teri aankh mein wo murawwat nahin rahi

teri nazar ke sath badalta raha hai dil

do roz bhi to ek si haalat nahin rahi

tar-damani se hath na dho ai dil-e-hazin

kya ab KHuda ki josh pe rahmat nahin rahi

dekhega KHwab mein bhi na wo surat-e-sukun

jis ko KHuda se chashm-e-inayat nahin rahi

un ki gali nahin hai na un ka harim hai

jannat bhi mere waste jannat nahin rahi

kis shab taDap taDap ke na kaTi tamam shab

kis roz mere ghar pe qayamat nahin rahi

'nadir' na aae harf tumhaari zaban par

wo sher kya hai jis mein fasahat nahin rahi