dil muzmahil hai un ke KHayalon ke bawajud

dil muzmahil hai un ke ḳhayāloñ ke bāvajūd

ik sail-e-tīrgī hai ujāloñ ke bāvajūd

allah rī ārifāna-tajāhul kī shoḳhiyāñ

samjhe na merā haal misāloñ ke bāvajūd

badlā na chashm-e-shauq kā koī bhī zāviya

bigḌe hue zamāne kī chāloñ ke bāvajūd

vāraftagī-e-shauq ajab tāziyāna thī

baḌhnā paḌā hai paañv ko chhāloñ ke bāvajūd

un kī vafā pe aaj bhī īmān hai mirā

ai vahm tere sad.hā savāloñ ke bāvajūd

ye kaun sā maqām hai ai zo.am-e-āgahī

kuchh sūjhtā nahīñ hai ujāloñ ke bāvajūd

kam ho sakā na martaba-e-be-ḳhudī-e-shauq

aql-o-ḳhirad ke sad.hā kamāloñ ke bāvajūd

ishq ik ḳhayāl-e-ḳhām hai un ke ḳhayāl meñ

'qādir' ke aise chāhne vāloñ ke bāvajūd

dil muzmahil hai un ke KHayalon ke bawajud

ek sail-e-tirgi hai ujalon ke bawajud

allah ri aarifana-tajahul ki shoKHiyan

samjhe na mera haal misalon ke bawajud

badla na chashm-e-shauq ka koi bhi zawiya

bigDe hue zamane ki chaalon ke bawajud

waraftagi-e-shauq ajab taziyana thi

baDhna paDa hai panw ko chhaalon ke bawajud

un ki wafa pe aaj bhi iman hai mera

ai wahm tere sadha sawalon ke bawajud

ye kaun sa maqam hai ai zoam-e-agahi

kuchh sujhta nahin hai ujalon ke bawajud

kam ho saka na martaba-e-be-KHudi-e-shauq

aql-o-KHirad ke sadha kamalon ke bawajud

ishq ek KHayal-e-KHam hai un ke KHayal mein

'qadir' ke aise chahne walon ke bawajud