dil muztarib hai aur nazar be-qarar hai

dil muztarib hai aur nazar be-qarār hai

ai aane vaale aa ki tirā intizār hai

aisā na ho ki mai-kada luT jaa.e sāqiyā

betāb tishnagī se har ik mai-gusār hai

ehsān uTh sakegā kisī aur kā to kyā

terī nigāh-e-lutf bhī ab dil pe baar hai

bichhḌā jo us se phir vo fazā meñ bikhar gayā

shāyad zamāna dosh-e-havā par savār hai

ham se nazar milā ke kaho sāhab-e-chaman

kis ke lahū se ġhuncha-o-gul par nikhār hai

donoñ jahāñ simaT ke mire dil meñ rah ga.e

shāyad tumhārā ġham hī ġham-e-rozgār hai

nazzāra-e-bahār se taskīñ ho kyā use

jis kī nazar meñ terā ruḳh-e-pur-bahār hai

phir ḳhanda-zan ho tujh ko mohabbat kā vāsta

terī hañsī se mere junūñ kā vaqār hai

vo garm-tāz arsa-e-hastī huuñ ai 'bahār'

aalam mire safar hī kā gard-o-ġhubār hai

dil muztarib hai aur nazar be-qarar hai

ai aane wale aa ki tera intizar hai

aisa na ho ki mai-kada luT jae saqiya

betab tishnagi se har ek mai-gusar hai

ehsan uTh sakega kisi aur ka to kya

teri nigah-e-lutf bhi ab dil pe bar hai

bichhDa jo us se phir wo faza mein bikhar gaya

shayad zamana dosh-e-hawa par sawar hai

hum se nazar mila ke kaho sahab-e-chaman

kis ke lahu se ghuncha-o-gul par nikhaar hai

donon jahan simaT ke mere dil mein rah gae

shayad tumhaara gham hi gham-e-rozgar hai

nazzara-e-bahaar se taskin ho kya use

jis ki nazar mein tera ruKH-e-pur-bahaar hai

phir KHanda-zan ho tujh ko mohabbat ka wasta

teri hansi se mere junun ka waqar hai

wo garm-taz arsa-e-hasti hun ai 'bahaar'

aalam mere safar hi ka gard-o-ghubar hai