دل مضطرب ہے اور نظر بے قرار ہے

دل مضطرب ہے اور نظر بے قرار ہے

اے آنے والے آ کہ ترا انتظار ہے

ایسا نہ ہو کہ مے کدہ لٹ جائے ساقیا

بیتاب تشنگی سے ہر اک مےگسار ہے

احسان اٹھ سکے گا کسی اور کا تو کیا

تیری نگاہ لطف بھی اب دل پہ بار ہے

بچھڑا جو اس سے پھر وہ فضا میں بکھر گیا

شاید زمانہ دوش ہوا پر سوار ہے

ہم سے نظر ملا کے کہو صاحب چمن

کس کے لہو سے غنچہ و گل پر نکھار ہے

دونوں جہاں سمٹ کے مرے دل میں رہ گئے

شاید تمہارا غم ہی غم روزگار ہے

نظارۂ بہار سے تسکیں ہو کیا اسے

جس کی نظر میں تیرا رخ پر بہار ہے

پھر خندہ زن ہو تجھ کو محبت کا واسطہ

تیری ہنسی سے میرے جنوں کا وقار ہے

وہ گرم تاز عرصۂ ہستی ہوں اے بہارؔ

عالم مرے سفر ہی کا گرد و غبار ہے